Babarkat Hai Woh Khuda Jiss ki Zaat Tak Buland Parwaz Himmaton Ki Rasayi Nahi Aur Na Aqal O Fehm Ki Quwwatain Ussay Paa Sakti Hain, Woh Aisa Awwal Hai Ke Jiss Ki Na Koi Ibteda Hai Ke Mehdood Ho Jaye Aur Na Koi Uss Ka Aakhir Ke Woh Wahan Tak Phonch Ker Khatam Ho Jaye.

Tamam Hamad Uss Allah Ke Liye Hai Jo Fayedon Aur Ataayon Ke Roknay Se Maaldar Nahi Ho Jaata Aur Jo Ataa Se Kabhi Aajiz O Qasir Nahi Hota.

Main Gawahi Deta Hoon Ke Uss Ke Ilawa Koi Layiq e Ibaadat O Ghulami Nahi, Jo Yakta O La Shareek Hai, Wo Awwal Hai Iss Tarah Ke Uss Se Pehle Koi Cheez Nahi, Woh Aakhir Hai Youn Ke Uss Ki Koi Inteha Nahi.

Her Cheez Uss Ke Samnay Aajiz O Sar Nagoon aur Her Shai Uss Ke Saharay Qayim Hai, Woh Her Faqar Ka Sarmaya, Her Zaleel Ki Aabroo, Her Kamzoor Ki Taqat Aur Her Mazloom Ki Panah Gah Hai.

Sari Hamd o Tahreef Uss Allah Ke Liye Jissay Hawas Nahi Pa Saktay Na Jaghain Ussay Ghair Sakti Hain, Na Parday Ussay Chuppa Saktay Hain, Woh Makhlooqat Ke Na Honay Ke Baad Honay Ka aur Unn Ke Hum Mushaba Honay Se Apny By Misl O Benazir Honay Ka Pata Deta Hai.

Hum Uss Ki Hamd O Sana Kerte Hain, Woh Her Chhuppi Howi Cheez Ki Ghehraiyon Se Aagah Aur Her Posheeda Shai Per Hazir O Nazir Hai, Woh Seenon Main Chhuppi Howi Cheezon Aur Chori Chhuppay Isharoon Ka Jannay Wala Hai.

Tamam Tahreef Uss Allah Ke Liye Jo Tamam Kainaat Ke Paida Kerne Se Apnay Wajood Ka Pata Dene Wala Hai, Na Hawaas Ussay Chhoo Saktay Hain Na Parday Ussay Chhupa Saktay Hain.

Tamam Tahreef Uss Allah Ke Liye Jiss Ne Apni Hakoomat ” Barayi” Jalal o Kibriyai Ke Aasar Zahir Ker Ke Apni Qudrat ki Khobsoorti Se Ankh Ki Putliyon Ko Hairan Ker Diya Hai.

Tamam Tahreef Uss Allah Ke Liye Jo Nazar Aye Baghair Jaana Pehchana Howa Hai Aur Soch Wichar Main Parre Baghair Paida Kerne Wala Hai.

Tamam Tahreef Uss Allah Ke Liye Jiss Ki Mahrfat Ki Haqeeqat Zahir Kerne Se Sub Aajiz Hain Aur Iss Ki Azmat O Bulandi Ne Aqloon Ko Rok Diya Hai.